قالوا ناس زمان - ناس بكري - أحلى كلام

الناس بكري واش قالو 

-كيف تبدأ قول بسم الله وكي تكمل قول الحمد لله.

-ماتتعراش ونتا عرقان, ومتشربش الماء ونتا عرقان, وماتكسلش رجليك وسط الجماعة, وماتوكلش أولادك وسط الجماعة.

-ماتشربش بالواقف, وجهك نقيه ماتدري واش تلاقي بيه ولي فاتك بالزين فوتو بالتبسيمة, ولي فاتك باللبسة فوتو بالنظافة, ولي فاتك بالعلم فوتو بالظرافة, ولي فاتك بالصيغة فوتو بالسياسة, ولي فاتك بالمال فوتو بالقناعة.

-ولد السبع مايجي مشحاح والدفلة ماتجيب التفاح, دقيق البشنة مايجي منو طعام, وصوف الكلاب مايجي منو  البرنوس, وكبير العرش طيعو, وكبير الراس والكرش بالرخس بيعو.

-زين السوق قعادو, وزين الفراش أولادو, وزينة الحديث كي يعود موش في الصواب سكاتو.

-عرة الفاكية البرقوق, وعرة النساء لي طيب وتضوق, وعرة الرجال لي سوق بعد سوق.

-إذا كنت شين أستر فضايحك وإذا كنت زين أستر روحك من العين.

إذا طاحو السنين تروح البنة وإذا راحو العينين تروح الدنيا وإذا راح النيف تروح الهمة. وإذا راحو رجال تروح الحرمة وإذا راحو الوالدين تروح اللمة